CHADEMA:'Tutakula sahani moja'

Tundu Lissu, Mwanasheria Mkuu wa Chama cha Democrasia na Maendeleo (Chadema)

Mwandishi wetu

CHAMA cha Demokrasia na Maendeleo (Chadema), kimesema kitabudi njia nyingine zingine za kufanya siasa na kukutana na wananchi licha ya Rais John Magufuli kupiga marufuku mikutano ya vyama vya siasa hadi mwaka 2020.

Tundu Lissu, Mwanasheria Mkuu wa Chama hicho ameyasema hayo wakati akizungumza na viongozi wa vyama vya siasa kutoka nchi mbalimbali za Afrika ambao wako nchini kwa ziara ya mafunzo ya kisiasa.

“Sisi ni wanasiasa na hiyo ndio kazi yetu, sasa kama Rais amepiga marufuku tufanyeje? Hatuwezi kwenda kanisani eti tukasali ili turuhusiwe kufanya mikutano ya hadhara, tunachofanya ni kubuni mbinu zingine za kukabiliana na watawala na si kujifungia ndani na kukaa kimya,” amesema Lissu.

Amesema kuwa njia ambazo Chadema imepanga kufanya ili kuhakikisha chama kinaendelea kufikia wanachama wake na wananchi, ni vikao endelevu vya ndani ambapo walianza juma lililopita kwa kanda za Kati na Kusini.

Hata hivyo amesema Chama chochote cha siasa kinapaswa kujifunza kuishi katika mazingira ya kila aina, hivyo ili kuhakikisha Chadema inaendelea kuwa hai ni lazima ibuni njia mbalimbali za kufanya siasa.

BONYEZA HAPA KUTEMBELEA UKURASA WETU WA FACEBOOK