Lowassa ajitosa kuondoa njaa

Edward Lowassa

Na Mwandishi wetu.

EDWARD Lowassa, aliyekuwa mgombea urais kupitia chama cha Demokrasia na Maendeleo (Chadema) mwaka 2015 ameungana na viongozi wa dini na wanasiasa nchini katika kile kinachoonekana kuwepo kwa mwelekeo mbaya wa upatikanaji wa chakula nchini na kutaka tahadhari ichukuliwe.

Hayo yanafanyika huku Rais John Magufuli akigoma kutambua hali hiyo ya upungufu wa chakula na baa la njaa kwa baadhi ya maeneo nchini.

Pia Taasisi ya Baraza Kuu la Waislam Tanzania (Bakwata) na Baraza la Maaskofu Tanzania (TEC) zimewataka waumini wao kuomba mvua kutokana na baa la nja nchini.

“Serikali imesema haitoi chakula, mimi nimejadiliana na chama changu tumeona tufanye mpango wa kuwatafutia chakula Watanzania.

“Hata kama ni kutoka nje ya nchi ninaamini dunia itatusiia,” ameeleza Lowassa, Waziri Mkuu Mstaafu kwenye mkutano wa kampeni za Udiwani Bukoba.

Kauli ya Lowassa na viongozi wa dini inakwenda kinyume na ile aliyoitoa Rais John Magufuli alipokuwa mjini Bariadi mkoani Simiyu ambapo alisema, suala la kuwepo kwa njaa ni uzushi na kwamba, yeye ndiye mwenye mamlaka ya kutoa taarifa za njaa kwa mujibu wa sheria na taratibu za nchi.

Kwenye mkutano huo Rais Magufuli alidai taarifa za kuwepo kwa njaa zinasababishwa na wafanyabiashara ambao wamezoea pale panapokuwepo na ukame wanatumia vyombo vya habari kudai kuwepo njaa.

“Wapo wafanyabiashara wengine wachache waliokuwa wamezoea panapotokea matatizo kidogo tu ya ukame wanatumia vyombo vya habari ikiwa pamoja na magazeti wanayoyaamini wao sio magazeti yote, pamoja na baadhi ya wanasiasa kuzungumza Tanzania kuna njaa.

“Anayejua njaa ni Rais na sio gazeti fulani mimi ndiyo niliyepewa dhamana ya kuwaongoza Watanzania,” alisema.

Pamoja na kauli hiyo taasisi kubwa zinaeleza kuwepo kwa baa la njaa kwa baadhi ya maeneo ikiwa ni pamoja na upungufu wa chakula nchini kutokana na kuwepo kwa ukame.

Tayari viongozi wa siasa wameeleza kuwepo kwa njaa na kuitaka serikali kuchukua hatua badala ya kuamini kinyume na hali halisi akiwemo Zitto Kabwe, Kiongozi Mkuu wa Chama cha ACT-Wazalendo.

“Kama Watanzania watakufa njaa kutokana na kutochukuliwa hatua sasa, serikali itakuwa kwenye wakati mgumu,” amesema Zitto, Mbunge wa Kigoma Mjini huku akiitaka serikali kutekeleza wajibu wake kwa wananchi.

Zitto ametoa tahadhari hiyo alipokuwa kwenye mkutano wa kampeni za udiwani Kijichi jijini Dar es Salaam na kwamba, wanasiasa wanatumia wasaa wa mikutano ya kisiasa iliyoruhusiwa kwa sasa kueleza hali halisi ya nchi.

Lowassa amemtia majaribuni Rais Magufuli kwa kumtaka kutafakari upya kauli yake kuhusu hali ya chakula nchini.

“Mashirika makubwa ya dini nchini yamethibitisha kuwa kuna uhaba wa chakula lakini serikali bado inaendelea kukana tatizo hilo. Narudia namuomba rais atafakari upya kauli zake kuhusu suala hili,” amesema Lowassa.

Sambaza kwenye Google Plus

Kuhusu Anonymous

Hii ni Blog yenye jukumu la kukupasha habari za Mtanzania mwenye hali ya chini ambaye hajapata nafasi ya kutoa maoni yake.