Faru anapokuwa na thamani kuliko binadamu!!

Mwigulu Nchemba, Waziri wa mambo ya ndani

Na Mwandishi wetu

BADO inashangaza tunakoekelekea na umuhimu wa vipaumbele katika jamii yetu ya Kitanzania!!

Ni wiki kadhaa sasa tangu kuwepo na kile ninachoweza kuita sakata la Faru kufa, na hii imepelekea mamlaka kubwa ya Waziri Mkuu kuingilia kati na kudai ushahidi wa kifo cha mnyama huyo. Lakini pia hili limekuja sambamba na miili ya watu inayookotwa ikiwa imefungwa na kutumbukizwa Mto Ruvu.

Ni wazi kuwa, haya ni matukio yanayohitaji utayari wa jamii hasa mamlaka yaani serikali. Kwa uelewa wangu na matarajio yangu nilifikiri kuwa mwanadamu ana umuhimu mkubwa labda kuliko mnyama, kumbe hili ni wazo langu tu na labda mawazo na vipaumbele vya watu na mamlaka havifanani!!

La kushangaza ni kile ninachokiona kuwa ni upuuziaji wa mauaji ya watu, ambao umeonekana wazi hasa pale Waziri wa Mambo ya Ndani, Mwigulu Nchemba aliposema kwa wepesi kuwa hizo maiti ni za wahamiaji haramu na hakuonyesha umuhimu wa hatua zozote kujua uhakika wa hilo alilolisema. Hata kama ni kweli hao ni wahamiaji haramu, kifo ndio stahili yao?!!!

Zaidi ni pale umuhimu wa kujua hao maiti ni nani hautiliwi maanani tena wakati tuko kwenye hali ya wasiwasi wa watu kupotelewa na ndugu zao. Hatusikii kiongozi mkubwa kama Waziri Mkuu akionyesha msisitizo wa kufukua maiti hizo ili zitambuliwe na ikiwezekana sababu za vifo hivyo na ikiwezekana waliohusika wajulikane na kuchukuliwa hatua. Zaidi Mkuu huyu anaonekana akijikita kutafuta uhalisia wa kifo cha Faru(Faru John) huku binadamu wakiachwa kama kitu kisicho na umuhimu. Inashangaza na kutia shaka juu ya umuhimu wa watu katika awamu hii.

Hapa Napata maswali kuwa maisha na usalama wa binadamu kipindi hiki sio kipaumbele muhimu? kwani mnyama anaweza kuchukua nafasi hata kuliko binadamu?