Nyumba ya Mwenyekiti CCM yachomwa moto

Kamanda wa Polisi mkoa wa Kilimanjaro, Kamishna Msaidizi wa Polisi, Hamisi Issah alithibitisha jana kutokea kwa tukio hilo ambalo limemjeruhi mwenyekiti huyo na kukimbizwa Hospitali Teule ya Misheni ya St. Joseph iliyopo Moshi mjini.

Ingawa hakutaka kuzungumzia kwa undani ajali hiyo, Kamanda Hamisi alisema polisi wanaendelea kufanya uchunguzi wa kina wa tukio hilo lililotokea Machame, wilaya ya Hai.

“Ni kweli nyumba yake imechomwa moto na watu wasiojulikana na yeye amejeruhiwa kwa moto mguuni... tuko kwenye uchunguzi kwenye eneo la tukio,” alisema Kamishna Issah.

Alipotafutwa kwa njia ya simu kuzungumzia tukio hilo, Mkuu wa Wilaya, Gelasius Byakanwa ambaye pia ni mwenyekiti wa kamati ya ulinzi hakupatikana kutokana na simu ya mkononi kuita bila majibu.

Katibu wa CCM mkoa wa Kilimanjaro, Jonathan Mabihya alisema wakati watu hao walipovamia nyumba hiyo usiku wa manane, mwenyekiti huyo alikuwa amekaa varandani na familia yake.

"Nimekwenda kumjulia hali katika Hospitali ya St. Joseph na amepata majeraha ya moto ambayo yamesababisha alazwe ili kupata matibabu ya karibu zaidi," alisema.

"CCM tumepokea taarifa hizo kwa masikitiko makubwa na tunaamini vyombo vya dola havitakaa kimya."

Alisema licha ya watu hao kukimbia baada ya kutekeleza kusudio lao, anaamini watakamatwa na kuchukuliwa hatua za kisheria.

Sambaza kwenye Google Plus

Kuhusu Anonymous

Hii ni Blog yenye jukumu la kukupasha habari za Mtanzania mwenye hali ya chini ambaye hajapata nafasi ya kutoa maoni yake.