Usifanye mambo haya unapokuwa kwenye kazi, ni hatari

Kanuni muhimu ya kulinda ajira yako ni kuishi kama mfanyakazi.

Matokeo ya ama kudumu kazini au kupoteza kazi, hutokana na aina ya maisha ambayo unakuwa umejichagulia.

Kila tabaka lina aina ya maisha ambayo limejichagulia. Mathalani, kwa wanamuziki, muda mwingi wa mchana unaweza kuwakuta wamelala, lakini usiku wanakuwa kwenye majukumu yao yanayowaingizia kipato.

Siyo jambo la ajabu kukutana na mwanamuziki usiku wa manane akiwa klabu. Akitoka hapo anakwenda kulala. Mizunguko ya usiku ni aina ya maisha ya wanamuziki. Usiku ndiyo mchana wao. Akaunti zao benki hunawiri kwa namna wanavyowajibika usiku.

Wachimbaji na wafanyabiashara wa madini, wao majukumu yao ni ya msimu zaidi. Wakipata leo wanaweza kuchukua muda kupata mawe mengine ili wayauze. Hao unaweza kuwakuta wamelewa mchana na usiku. Wanaita kujipongeza kwa kazi nzuri na uvumilivu.

Yapo makundi mengi ambayo ratiba zao za kulala na kuamka haziwabani. Hawana daftari la kusaini mahudhurio kila asubuhi mapema wala hawasaini alama ya vidole kwa kampuni zinazotumia mashine za kielektroniki.

Tambua ajira yako

Umeona makundi mbalimbali na maisha yao. Jiulize unafanya kazi gani? Kama unapaswa kuamka asubuhi kuwahi kazini kisha ukawa unashindana na wenye kukesha kumbi za starehe, hakika kazi yako itakushinda.

Watu wengi wamekuwa wakishindwa kutofautisha ajira zao na za wengine. Mtu anaamka asubuhi kuwahi kazini, akitoka harudi nyumbani anaunganisha kumbi za starehe na kurejea nyumbani alfajiri. Anafika na kubadilisha nguo kisha anaeleka kazini.

Ratiba anayojiamulia inamfanya aishi kwa shida kazini. Anafika kazini akiwa amechoka, utendaji wake unakuwa wa ovyo kwa sababu apati muda wa kupumzika, matokeo yake anaharibu kazi.

Mwingine kutokana na maisha ya nje ya kazi anajikuta kila siku anachelewa kufika kazini. Tabia hiyo inamfanya agombane na viongozi wake kila siku. Mara kwa mara anapokea onyo la mdomo au la barua kutoka kwa meneja rasilimali watu.

Ulipotoka kazini ulijumuika na marafiki ukalewa mpaka karibu na asubuhi. Unapoingia kazini unakosa ufanisi. Unakuwa na mawenge mengi kutokana na mwangwi unaokuwepo kichwani, unaosababishwa na matukio ya usiku kucha.

Wakati mwingine unaingia kazini ukiwa na kiwango kilevi au kwa kuzidiwa na usingizi pamoja na uchovu, unashindwa kuendana na wafanyakazi wenzako. Yote hayo ni mambo ya kuzingatia.

Mtu wa aina hiyo anapofukuzwa kazi, hawezi kusingizia kuwa kilichosababisha ni mazingira ya kazini, bali maisha yake nje ya kazi ndiyo yanakuwa yamemtengenezea matokeo ya kusitishwa kwa ajira yake.

Nje ya hehaheka za usiku

Unaweza ukawa si mtu hekaheka za usiku. Hata hivyo, bado aina ya maisha yako nje ya kazi yakawa na gharama kubwa kwenye ajira yako.

Mathalani, nje ya kazi una marafiki ambao mnazungumza lugha chafu isiyovumilika, ukiwa kazini unajikuta unamtamkia maneno machafu mfanyakazi mwenzako.

Nje ya kazi unakuwa na watu wapenda umbea na utesi. Nawe unazoea tabia hizo, kwa hiyo unakuwa mwingi wa kuteta wenzako kazini na kuchonganisha wafanyakazi wenzako mpaka tabia hiyo inakugharimu.

Unakuwa na matumizi makubwa nje ya kazini kwako. Kwa hiyo unajikuta unakuwa mtumwa wa madeni. Wanaokudai wanakusumbua mpaka unashindwa kutulia kazini utimize majukumu yako.

Umeajiriwa ufanye kazi na menejimenti inahitaji kuona matokeo ya ajira iliyokupa. Wewe unageuka kituko, viongozi wako wanakuona mzigo. Unadhani watakuvumilia mpaka lini? Hakitapita kipindi kirefu watakuondoa kazini.

Ukiwa nje ya ajira, fahamu kuwa aina ya maisha uliyokuwa unaishi nje ya kazi ndiyo yamegharimu ajira yako. Lazima utambue nafasi yako na uitumikie inavyotakiwa.

Unafanya kazi za utendaji. Muda wote unatakiwa uwe unakimbizana na kazi. Kwa vile nje ya kazi umezoea kupiga soga na marafiki, matokeo yake ukiwa kazini unakuwa mtu wa maongezi kuliko kazi.

Siku utakapopokea barua ya kusitishiwa ajira yako, hutakiwi kumtafuta mchawi, bali rejea mazingira yako ya kupenda kusogoa nje ya kazi halafu unganisha na jinsi tabia hiyo ulivyoingia nayo kazini.

Tengeneza mazingira bora

Ukishakuwa kwenye ajira, hakikisha unatengeneza mazingira bora yatakayokubeba kwenye kazi yako. Tumia muda nje ya kazi kujielimisha zaidi kuhusu kazi unayofanya pamoja na kupumzika.

Tenga muda wako vizuri na uhakikishe unapoingia kazini unakuwa sawasawa kimwili na kiakili. Jiweke mbali na ratiba za kukuchosha kimwili na kiakili. Unapoingia kazini unapaswa kweli uonekane umeingia na nguvu mpya. Si jambo la kuvutia kwa mfanyakazi kuingia kazini asubuhi ukiwa umechoka, utafanyaje kazi?

Lazima utambue kuwa yapo maisha ya wakeshaji wa usiku na uamue kuwa hayo si ya kwako. Itazame kazi yao kwa nidhamu, halafu maisha yako nje ya kazi uyafanye yafanane na hiyo kazi yako.

Usiishi kama mwanamuziki kila usiku uwe kumbi za starehe wakati wewe ni ofisa wa benki. Usimuige muuza dawa za kulevya kuishi kwa anasa nyingi, wakati unategemea mshahara wa mwisho wa mwezi.

Unaweza kushawishika uanze wizi ambao siyo tu utakuharibia kazi bali pia unaweza kujikuta uko kifungoni. Kondakta wa daladala akiwa kazini kwake anazungumza sana, ila wewe ni nesi unahudumia wagonjwa, kwa hiyo hutakiwi kupayuka utawaumiza wagonjwa. Kelele unazokutana nazo nje, usiziingize kazini kwako.

Sambaza kwenye Google Plus

Kuhusu Anonymous

Hii ni Blog yenye jukumu la kukupasha habari za Mtanzania mwenye hali ya chini ambaye hajapata nafasi ya kutoa maoni yake.